«أكثروا الدعاء وقت نزول القبر».. تامر ضيائي ينشر وصيته بعد نجاته من جلطة (10 بنود)

كشف الفنان تامر ضيائي عن وصيته حال وفاته، بعد تعرضه في الفترة الأخيرة إلى وعكة صحية وإصابته بجلطة وخضع لعملية في القلب.

وصية تامر ضيائي

ونشر تامر ضيائي منشورا عبر صفحته الرسمية على موقع التواصل الاجتماعي «فيسبوك»، تحت عنوان «وصية».

وكتب ضيائي: «بوست الوصية.. ده هيفضل باين على صفحتي لحد ما أموت، الحقيقة اللي كلنا عارفينها ومتأكدين منها أننا كلنا ربنا كاتبلنا إننا نموت في ميعاد محدد غير معروف، وعشان كده كتبت الكلام ده لأنى محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة، ووقتها طبعًا مش هعرف أقولها لحد».

بنود وصية تامر ضيائي

وذكر تامر ضيائي تفاصيل وصيته، والتي تتمثل في 10 بنود، قائلا:

1- صلاة الجنازة أهم من العزاء وهي اللي كل ما العدد زاد كل ما ثوابى ما كان أكتر، فأرجوكم تصلوا عليا.

2- مش شرط تيجى العزاء وياريت لو اتعمل فى البيت أو مكان بسيط بفلوسه تطلعولي صدقة جارية أفضل.

3- من فضلكم لم يثبت أو يتفق عليه عمل ختمة قرآن للمتوفى إنها هتوصله، بس مثبت إن الدعاء والصدقة بيوصلوا للميت، فرجاء دى بالذات بلاش وادعولي الوقت اللى هتقروا فيه جزء فضوا نفسكم واقعدوا ادعوا فيه.

4- بلاش صدقة جارية تقليدية وسهلة ومش مستفاد بيها يعنى المصاحف كتير فى مصر أوى وكل بيت فيه كتير فممكن نحط الفلوس فى جامع بيتبنى أو كرسى متحرك فى مستشفى يستفيدوا بيها المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة.

5- دي نقطة مهمة أوى بالنسبة ليا.. محدش يقول لحد بتعيط عليه ليه، ومتعيطش عشان هو بيتعذب!! الكلام دة غلط، سيبوهم يعيطوا لحد ما يطلعوا كل الشعور اللى عندهم ومفيش حاجة بتقول إن العياط معناه عدم رضا بقضاء ربنا “وأبيضت عيناه من الحزن فهو كظيم.

وصية تامر ضيائي بعد تعرضه لجلطة

6- أهم حاجة تاني هي الدعاء وبس والصدقة.

7- من فضلكم تكثروا الدعاء وقت نزول القبر وتتصدقوا بأى حاجه بنية إن ربنا يجعل قبري روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني أقعدوا معايا شوية ومتستعجلوش تمشوا عشان تونسوني في ليلة زى دي.

8- الموت علينا كلنا حق وإحنا كلنا أمانات ربنا وهيردنا تانى، فالحزن على الفراق هونوا على نفسكم بالدعاء ليا عشان أبقى في سعادة لحد ما أقابلكم تاني.

9- “اللي بيحبوني يدعولي كتير عشان لو مفيش حد يدعيلي.

10- دى مهمة أوي عاوز الكل يسامحني على أي حاجه عملتها فيه بقصد أو بدون قصد.

تامر ضيائي يكتب وصيته

واختتم تامر ضيائي وصيته قائلا: «اللهم إن كثر موت الفجأة من حولي وكثر موت الشباب غفلة، يارب إن كنت أنا القادم فأحسن خاتمتي و يسّر طلوع روحي و هوّن عليّ سكراتي فإني أحب أن أرحل في هدوء و سكينة و طمأنينه، ولا تقبض روحي إلا وأنت راضٍ عني لكي أكون عبدا مقبولا عندك حتي أليق بلقائك العظيم و إن كان لي من العمر باقي فأغفر لي ذنوبي و معاصي نفسي الأمّارة بالسوء و أعفو عني و أمحو لي كل ما يعرقل طريقي إليك و ردّني إليك ردّاً جميلاً يارب العالمين».

آخر أعمال تامر ضيائي

وكانت آخر أعمال الفنان تامر ضيائي، مشاركته في مسلسل «فراولة» الذي عرض في النصف الثاني من موسم رمضان لعام 2024، وكان من بطولة النجمة نيللي كريم والفنان صدقي صخر.

اقرأ أيضاً«بداية جلطة دعواتكم».. الفنان تامر ضيائي يطلب من جمهوره الدعاء

الفنان تامر ضيائي: العين صابتني.. وعكة صحية مفاجأة ادعولي

بعد تعرضه لجلطة.. تامر ضيائي يخضع لعملية قسطرة في القلب