الان – هيمشي بـ3 شروط.. محمد الضاوي كريستو يصدم إدارة الأهلي.. شوبير يفجر المفاجأة عن الزمالك – البوكس نيوز

في انتقالات يناير 2023.. أعلن النادي الأهلي، التعاقد مع محمد الضاوي كريستو.. جوهرة النجم الساحلي ومنتخب تونس.. لاعب واعد والكل في تونس كان متوقع إنه يخرج من النجم الساحلي على أوروبا.. ويكون له مستقبل مهم.. لكن قدام عرض النادي الأهلي مقدرش يرفض الانضمام لأفضل نادي في القارة.

والصفقة دي دلوقتي عدي عليها سنتين.. ومعملش حاجة في الأهلي وأحبط كل الجماهير.. وبقي مصدر مشاكل في الأهلي.. وصدم إدارة النادي وحط 3 شروط عشان يمشي.. أيه اللي حصل؟.. وأيه مستقبله؟.. وهيروح الزمالك ولا لأ؟.. ده اللي هنعرفه في “عرب 22”.

أزمة كبيرة موجودة في النادي الأهلي سببها التونسي محمد الضاوي “كريستو”، اللي مش بيشارك مع الفريق وخرج من حسابات مارسيل كولر وبقي قاعد على الدكة ومش بيشارك في الماتشات.

مصادر قالت إن المسئولين في الأهلي طلبوا منه يطلع إعارة في الموسم الجديد أو يدخل في صفقات تبادلية مع اللعيبة اللي عايزين يجيبوهم السنة الجاية.. لكن اللاعب رفض بشكل مطلق الخروج من الأهلي على سبيل الإعارة عن طريق النادي.. وطلب الرحيل بشكل نهائي وياخد باقي مستحقاته المالية في عقده اللي مستمر مع النادي لمدة 3 سنين جاية كاملة.

كريستو رفض يخرج من خلال الأهلي بسبب غضبه الشديد من استبعاده من مباريات الأهلي من وقت انضمامه بسبب رفض كولر اللي مش مقتنع بيه.

الإعلامى أحمد شوبير اتكلم عن أزمة النجم التونسي وقال: “كريستو عنده أزمة فى الأهلى.. اللاعب معجبش كولر اللي طلب رحيله عن الفريق وقال مش عايزه.. وفي نفس الوقت إدارة الأهلى مقتنع باللاعب وإمكانياته خصوصا أن سنة صغير وممكن يتقيد تحت السن.. كريستو عايز يمشى وعايز الموسم يخلص على أحر من الجمر عشان يمشى لأنه بيتدرب بس ومش بيشارك فى المباريات ومتأقلمش مع الفريق”.

إدارة الأهلي منتظرة رجوع الضاوي من إجازته في تونس آخر الأسبوع عشان يقعدوا معاه ويحاولوا يوصلوا لحل الأزمة خصوضا بعد قرار الجهاز الفني بالاستغناء عن خدمات اللاعب عشان يوفر مكان أجنبي في قائمة الفريق السنة الجاية.

المسؤولين في الأهلي هيحاولوا يقنعوا كريستو يوافق على الخروج إعارة لأي فريق في الدوري المصري.. وميفسخش عقده.. عشان الفلوس اللي دفعوها للنجم الساحلي التونسي اللي بتوصل لـ2 مليون دولار غير مرتبه سنتين من غير لعب والأهلي معرفش يستفيد منه.. والأهلي رافض يفرط في كريستو بشكل نهائي أو يدفعوا باقي المرتب لمدة 3 سنين ويسبوه يمشي.

الأهلي بيحاول إقناع اللاعب بالرحيل لنادي زد مقابل دخوله في صفقة تبادلية مع مصطفى العش مدافع زد اللي هييجي مكان محمود متولي اللي هيمشي في الصيف.

وفيه مصادر قالت إن نادي الترجي الرياضي هو اللي هيكون نادي كريستو في السنة الجديدة.. وده اللي بتأكده الصحف التونسيه اللي بقول إن الترجي التونسي عنده رغبة في انضمام الموهوب أفضل لاعب في تونس كريستو اللي غايب عن المشاركة مع الأهلي.

المصادر أكدت أن إدارة الأهلي مش عايزة اللاعب يروح الزمالك وعشان كدا هيبعوه للترجي بأي سعر يقدمه ومش هينهوا التعاقد معاه.

كريستو شارك مع النجم الساحلي في 30 ماتش في موسم ونص في بطولات مختلفة أبرزهم دوري أبطال أفريقيا.. والدوري التونسي وكأس تونس وكل ده وهو لسه 18 سنة وأرقامه بالنسبة لسنه كانت مبشرة جدا.

وفي آخر 5 ماتشات ليه مع النجم الساحلي قبل ما ينضم للاهلي شارك في 6 أهداف سجل 4 وصنع 2.. ودي أرقام كبيرة على لعيب صغير في السن.

يعني إحنا كنا قدام موهبة مش عادية والكل مستني منها الكثير داخل النادي الاهلي.. لكن ده ما حصلش مبدئيا ومشاركش غير في 13 ماتش مع الأهلي بينزل بديل.. ومش بيدخل قايمة الماتشات.