الان – بينهم لقطة بمليون جنيه ليست بكاء رونالدو.. 7 مشاهدة مثيرة في خسارة النصر من الهلال.. ومفاجأة سعيدة لـ الأهلي المصري – البوكس نيوز

الهلال خد كاس خادم الحرمين الشريفين من النصر وكريستيانو عيط.. والجماهير العربية كلها بتتكلم على الماتش اللي كان ضرب نار وكله كورة وفنيات.. يعني بتتفرج على كورة بجد.. لكن تصدق أن الأهلي المصري وجماهيره هم الكسبانين من اللي حصل!.. إزي ده؟.. وأيه علاقة الأهلي بخسارة النصر بطولة في السعودية؟.. وأيه حكاية اللقطة أم مليون جنيه غير بكاء رونالدو؟.. ده اللي هنعرفه مع بعض في “عرب 22”.

فريق الهلال قدر يفوز على النصر بركلات الترجيح بعد نهاية الماتش بالتعادل الإيجابي.. وحصد لقب أغلى الكؤوس.. لكن المشاهد المثيرة ظهرت قبل بداية المباراة وكان نجمها الأسطورة البرتغالي كريستانو رونالدو.

وفي آخر الماتش برضو كان هو بطل المشاهد واللقطات الجدلية وده حصل لما حارس الهلال ياسين بونو ضد آخر ركلة ترجيحة اللي حسمت تتويج الهلال بكأس خادم الحرمين.

وكريستيانو وقع على الأرض وقعد يعيط كأنه لسه لاعب ناشئ ودي أول بطولة يشارك فيها مش نجم كبير خد كل الألقاب والجوائز العالمية يعني لعيب مقفل اللعبة زي ما المثل المصري بيقول.

رونالدو ظهر الارتباك والتوتر عليه في وقت لعب الفريقين الركلات الترجيحة اللي هتحسم البطل.. ومرة كان بيسجد على الأرض بعد زمايله ما بيسجلوا ومرة تانية كان بيشير بعلامة الصليب.. والجماهير العربية كانت بتسخر من الحركة اللي بيعملها وتوتره.

كريستيانو في أول الماتش بعد ما نزل أرض ملعب الجوهرة المشعة شاف ولي العهد الأمير محمد بن سلمان.. وجه ليه التحية العسكرية.

وبعدها جماهير الهلال استفزته وهتفوا “ميسي ميسي” فقام هز رأسه يمين وشمال بمعني أنه مش راضي.. وكان قبل قال إن المفروض الجماهير متقولش اسماء لعيبة مش راضية تيجي تلعب في السعودية.

ديربي الهلال والنصر اتطرد فيه 3 لعيبة الأول هو حارس مرمى فريق دافيد أوسبينا في الدقيقة 54.. وفي آخر الماتش اتطرد ثنائي الهلال كوليبالي اللي دخل على حارس النصر بدون كرة.

وعلي البليهي اللي بيواصل استفزازه ومشاكله في الملعب وخد طرد مباشر لما تعدى على لاعب النصر.. وده أغضب جماهير الهلال اللي طالبته إدارة الأزرق بطرده برة الفريق خالص وقالوا أن تصرفاته فيها طفولية وكلها رعونة وكان ممكن الفريق يخسر بسببه.

جماهير الهلال علقت على بكاء كريستيانو وقالت أنه تمادي كتير ضد جماهير الهلال بتصرفاته.. لكن الزعيم لقنه درس مش هينساه في حياته.. وخلى فريقه النصر بقي بوابة عبور لـ3 بطولات الموسم ده.. الدوري والكاس والسوبر ده غير بطولة موسم الرياض.

يعتبر ده أفضل ماتش لرونالدو مع النصر.. وعمل كل حاجة في الكورة.. لكن الدبل كيك اللي عمله كان عالمي فعلا ولو اتسجل هدف .. الفار كان هيأكده وكان هيترشح لجائزة بوشكاش.

بس أداء باقي اللعيبة الأجانب في الفريق كان وحش وخاصة السنغالي ساديو ماني اللي من أول الموسم مقدمش أي حاجة وكأنه متأقلمش مع الفريق لحد دلوقتي.. ومش عارف يعمل حاجة من وقت خروجه من ليفربول.

ويمكن ده يسهل على الأهلي المصري فكرة التعاقد معاه بعد ما تداولت في السوشيال ميديا الفترة اللي فاتت.. والكلام اتقال إن الكابتن محمود الخطيب رئيس الأهلي هيتعاقد مع صفقات عالمية منها ماني عشان يشاركوا مع الفريق في بطولة كأس إنتركونتيننتال 2024 وهجهز باقي اللعيبة السوبر عشان كاس العالم للأندية 2025 اللي هيتلعب في أمريكا واللي الأهلي عايز يوصل لأبعد نقطة فيه خصوصا بعد النظام الجديد للبطولة.