الان – “8 أضعاف مرتبه وبند مثير في عقده مع الأهلي”.. مفاجأة في العروض المغرية لـ”كولر”.. وأول رد رسمي من الأهلي على الرحيل إلى السعودية – البوكس نيوز

حقق 8 بطولات وماشي كويس مع نادي القرن.. لكن الخلايجة مش عايزين يسبوه للأهلي عشان يكمل بطولاته وإنجازاته وبيجروا وراه.. وعرضوا عليه دولارات قد مرتبه 8 مرات عشان يسيب مصر.. لكن المفاجأة في رده.. أيه هو؟.. وأيه الشرط اللي عايزه عشان يكمل مع الأهلي؟.. والخطيب هيعمل معاه أيه؟.. ده اللي هنعرفه مع بعض في “قشة لفة بلس”.

الأندية الخليجية كل ما تشوف مدرب أو لاعيب ناجح يجروا وراه.. ويعرضوا عليه أضعاف اللي بياخده عشان يروح عندهم.. وده نفس اللي حصل مع مارسيل كولر المدير الفني للنادي الأهلي.. اللي آخر بطولة حققها هي بطولة دوري أبطال أفريقيا من الترجي.

الإعلامي الأهلاوي أمير هشام قال إن كولر عنده عرضين من السعودية ومنهم نادي بيلعب في جده.. وعرض تاني من فريق بيلعب في قطر.. لكن كولر مكمل في الأهلي وهو سعيد بوجوده مع الفريق وعايز الاستقرار.. وفيه تفاهم بينه وبين إدارة النادي.

كولر جدد عقده مع النادي الأهلي، لكن فيه شرط في عقده مع الفريق.. يقدر لو استخدمه يمشي قبل بداية الموسم الجديد من غير ما يدفع أي شروط جزائية.. ونفس الأمر ينطبق على إدارة النادي.

لكن رغم البند اللي موجود في عقد كولر فإدارة النادي الأهلي عايز تحصنه وتحميه من إغراءات الأندية الخليجية.

ومصادر في النادي ردت على التقارير اللي بتتكلم على رحيل مدرب الأهلي.. وقالت إن كل اللي بيتقال عن رحيل كولر عن الأهلي مش صحيح على الإطلاق.. والمدرب مستمر مع الفريق.. بل ده وافق على تجديد عقده مع النادي.

وكان فيه جلسة مع كولر بعد التتويج بدوري أبطال إفريقيا، وأعلن تمسكه بالاستمرار في الفريق.. وأكد للمسئولين في القلعة الحمراء أنه مش مركز غير على حصد لقب الدوري الممتاز.

إحنا اتفقنا مع كولر على التجديد وزيادة مرتبه بعد تلقيه عدة عروض الموسم الماضي.. وهو حاسس بارتياح جوة النادي في الوقت الحالي.. وتلقي كولر عروض للرحيل عن الأهلي أمر طبيعي.. لكن المدرب عمل استراتيجية الصفقات للموسم الجديد.. وده بيأكد أنه مستمر في الأهلي على رأس القيادة الفنية للفريق.

ومصادر تانية قالت إن السويسري مارسيل كولر طلب من إدارة الأهلي يزودوا مرتبه من 180 ألف دولار لـ220 ألف دولار في الشهر.. وده بعد العروض الكتيرة اللي جت ليه بأضعاف راتبه عشان يمشي من الأهلي.

كولر حقق 8 بطولات مع النادي الأهلي من السنة اللي فاتت وهي بطولة الدوري مرة واحدة، وبطولة كأس مصر لمرتين، وبطولة السوبر المصري 3 مرات ودوري أبطال إفريقيا مرتين.

خالد مرتجي أمين الصندوق في الأهلي قال إن كولر جه الأهلى بسبب كلامه مع الكابتن محمود الخطيب رئيس النادي وجاله عرض أضعاف اللى بياخده في الاهلى وهو ٨ مليون دولار.. وبرغم كده رفض بسبب حبه للنادي وطريقه إدارة الخطيب.

الأهلى هو اللى بينجح أى مدرب.. وكولر عايز يعمل بطولات وإنجازات وفيه ناس مشيت من الأهلى مكملتش في السعودية ومشيت.. الأهلى اللى بينجح.

كولر مدرب عنده إمكانيات كبيرة للغاية، والدليل إنجازته مع الفريق في الفترة اللي فاتت.. وده من وقت توليه مسئولية القيادة الفنية للفريق بعد المدرب البرتغالي ريكاردو سواريش.

ولسه جايب لينا بطولة دوري أبطال أفريقيا للمرة الـ12 وهنوفر ليه كل اللي عايزه عشان ينجح في الفريق ويعمل أرقام كويسة في كاس العالم للأندية.