الان – “يا أحنا يا هو”.. تفاصيل أزمة تصريحات محمد مجدي أفشة في الأهلي.. والخطيب يرفض طلبه – البوكس نيوز

“يا أحنا يا هو”.. مش هينفع نكمل مع بعض في الفريق.. واللي بيقوله علينا ده ميصحش إحنا بنلعب ونتعب.. ده الكلام اللي اتقال من ثلاثي الأهلي للكابتن خالد بيبو مدير الكرة في الأهلي بعد تصريحات محمد مجدي أفشة واللي قلبت الدنيا.. واللي بسببها اتغرم مليون جنيه.. ليه أفشة زعلان من جماهير الأهلي؟.. وأيه الطلب اللي رفضه الخطيب؟.. وأيه المشاهد اللي بتأكد نهاية مشوار نجم الأهلي مع الفريق؟.. ده اللي هنعرفه مع بعض في “عرب 22”.

تصريحات محمد مجدي أفشة لسه عاملة مشكلة كبيرة في النادي الأهلي.. والأزمة دلوقتي اتحولت من الجماهير للمدير الفني مارسيل كولر اللي اتفرج على حوار قفشة بالكامل واتضايق جدا من اللي حصل.. وخد موقف من اللاعب وقرر تجميد وتدريبه بشكل منفرد في الجيم.

كولر شايف إن اللاعب قلل من مجهوده اللي بيعمله مع الفريق ده غير الكلام اللي قاله على زمايله في أوضة اللبس محمود كهربا وإمام عاشور وأكرم توفيق، لما قال إن الناس بتدور على أصحاب اللقطات والشو والتريند.. أنا مظلوم من ناس كتيرة.. وبقينا ندور على الناس بتاعت اللقطات والشو والكلام عشان نديهم ونطلعهم”.

الكلام ده زعل الثلاثي ومصادر في النادي الأهلي قالت إن كهربا وإمام عاشور اتكلموا مع الكابتن خالد بيبو مدير الكرة وبلغوه بغضبهم من اللي حصل من أفشة.. وأنه بيحقد عليهم.. ومش بيحب الخير للفرقة.. وقررا أنهم يرفعوا شكوى عاجلة للمدير الفني.

بيبو بعد ما اتكلم مع كولر قرر توقيع عقوبة مالية مغلظة عليه.. وخصموا منه مليون جنيه.. وكولر قرر أن يجمد اللاعب لأجل غير مسمى ومش هيرجع التدربيات في الوقت الحالي.. والعقوبة تضاعفت عشان أفشة مسمعش كلام كولر وساب النادي وروح.

مدير الكرة قرر كمان يمنع محمد مجدي أفشة من الظهور في أي برنامج تلفزيوني تاني.. وبلغه ميعملش أي حوارات ولو حصل مش هيكتفي بتطبيق اللايحة عليه.

محمد مجدي أفشة بعد قرار كولر طلع قال للناس إن مفيش حاجة حصلت رغم صدور قرار بمعاقبته.. وكمان حاول يتواصل مع الكابتن محمود الخطيب رئيس النادي عشان يوضح ليه وجهة نظره لكن الخطيب رفض.. وبلغ المسئولين إن الكابتن خالد بيبو وكولر هما المسئولين عن فريق الكرة.

الإعلامي أحمد شوبير المقرب من مجلس إدارة الأهلي قال: “بعض من جماهير الأهلي زعلوا مني بسبب الكلام عن أزمة أفشة، مع أني بتكلم بكل احترام سواء عن أفشة أو غيره، لأنه أدي الكتير للنادي الأهلي بكل أمانة.. وليه دور مؤثر مع الفريق”.

“تصريحات أفشة الأخيرة كانت غير موفقة.. ودي بتحصل معانا كلنا.. بس بيحصل نوع من أنواع التوضيح أو الاعتذار، وده لازم يحصل.

حصل أزمة بعد تصريحات أفشة لأن كولر ليه طبيعة خاصة وعنده صرامة كبيرة.. ومبيهزرش في الحاجات دي، ومن قواعده الخروج عن النص ممنوع ومش هيمشي معاه.

تم منع أفشة من خوض التدريب وده خبر صحيح، وبلوم على اللي هاجموا إللي قال الخبر.. بقوله هو انت زعلان ليه؟، ده شغله ولازم يعمله ومش مطالب أنه يكتم على الخبر، ده انت غريب أوي، بدل ما تلوموا اللي جاب الخبر.. روحوا لوموا اللاعب.

أفشة جاهد عشان يطلع الحلقة دي، وأنا بقول كلام أكيد، وفيه أزمة وكولر زعلان جدا.. ولا بد من اعتذار اللاعب، وده أكيد هيحصل، لكن مش هتوصل للعرض للبيع، إلا لو حصل مفاجأة بقى، لكن اللاعب هيعاني في الفترة المقبلة، بسبب كلامه عن زمايله بالشكل ده.