الان – كان هيبقي أسطورة أهلاوية ومكالمة غيرت تاريخه.. مفاجأة في انتقال شيكابالا إلى الأهلي – البوكس نيوز

أسطورة ميت عقبة.. وواحد من أحرف لعيبة الكرة في مصر على مدار تاريخها.. كان على باب غريمه الأزلي النادي الأهلي ومكالمة غيرت تاريخه.. طبعا عرفت بنتكلم عن مين.. أيو هو شيكابالا.. اللعيب اللي ظلم نفسه وظلم الزمالك ومنتخب مصر.. ومعرفناش نستفيد من الحرفنة والمهارات الكبيرة اللي عنده.. لكن زي ما جماهير الزمالك شايفاه أسطورة.. الجماهير الأهلاوية بتقول عليه ده مجرد لاعب مش بيعمل حاجة.. أيه حكاية شيكابالا؟.. وأيه سر مفاوضاته مع الأهلي؟.. ومين اللي بيدعمه؟.. وقال أيه للعيبة الزمالك بعد فوز الأهلي بدوري أبطال أفريقيا؟.. وأيه قصة عقده الجديد؟.. ده اللي هنعرفه مع بعض في “قشة لفة بلس”.

محمود عبدالرازق حسن فضل الله شهرته “شيكابالا” من مواليد 5 مارس سنة 1986 في قرية الحصايا بأسوان.. انضم للفريق الأول بالزمالك وعمره 15 سنة و8 أشهر بس.. وحقق 17 بطولة مع الزمالك منها 4 بطولات دوري 2003 و2004 و2021 و2022 .. و6 بطولات كأس مصر و2 كأس السوبر الأفريقى والكونفدرالية.. وكأس السوبر المصري ومع منتخب مصر فاز ببطولة كأس العالم العسكرية سنة 2007، وكأس الأمم الأفريقية سنة 2010، ودورة حوض وادى النيل 2011.

شيكابالا ابن نادي الزمالك ومشجع درجة تالية وليه خلافات كتيرة مع جماهير النادي الأهلي وديما بتحصل مناوشات بينهم بعض النظر عن مين اللي غلطان.. لكن المفاجأة إن شيكايالا لولا الظروف كان هيبقي لاعيب في الأهلي.. وده اللي أكده الكابتن حسام البدري مدرب الأهلي السابق.

البدري قال إنه كان نفسه لعيب بقيمة شيكابالا يكون موجود في الأهلي.. وحصل تفاوض وكان خلاص على بوابة النادي لما كان في نادي باوك اليوناني.. لكن جه اتصال.. ومجلس الإدارة قال اقفلوا الباب ده خالص.. ولو لعب معانا في الأهلي كان هيفرق كتير.. ده شيكابالا برضو مش أي لاعب.

وبعدها شيكابالا رجع الزمالك وعمل شوية مشاكل وراح الوصل الإماراتي وسبورتينج لشبونة البرتغالي والإسماعيلي والرائد السعودي وأبولون اليوناني.. وبقاله من 2020 في الزمالك.. لكن قبل عقده ما يخلص الزمالك قرر يجدد ليه بفلوس رجل الأعمال ممدوح عباس اللي فتح خزاينه للنادي وقرر يجدد للنجوم الكبار ومنهم شيكا.

مصادر قالت إن شيكابالا خد عقده كاش وقبض تقريبا 30 مليون جنيه.. ومش عايز يعتزل دلوقتي ومكمل مع الفريق.. ورغم أن المدرب البرتغالي جوزيه جوميز مش عايزه في الفريق لكن مسئولين في الزمالك قالوا إن شيكابالا هو اللي هيحدد ميعاد اعتزاله وإحنا مش هنجبربه على حاجة.

وشيكابالا بيخطط لماتش السوبر اللي هيتلعب قدام الأهلي اللي فاز ببطولة دوري أبطال أفريقيا للمرة 12.. وقال لزمايله.. إن مباراة السوبر الإفريقي فرصة وجت لحد عندنا ولازم نستغلها.. الأهلي مش الفريق اللي يخوف.. ونقدر نفوز عليه ونعوض مباراة نهائي القرن اللي خسرنا فيها بفعل فاعل.. عايزين نرجع تاني أسياد أفريقيا زي زمان.

الكلام ده حصل بعد فوز الزمالك الكونفدرالية اللي حصلت فيها شوية مشاكل وقت التتويج ورفع الكاس.. وده اللي زعل لعيبة الزمالك عشان الاحتفالات اللي عملها شيكابالا وابنه وخاصة أحمد مصطفى زيزو اللي شايف إن شيكابالا كان عايز يعمل لقطة وخلى ابنه آدم يحتفل بالكاس قبل لعيبة الزمالك اللي تعبوا في البطولة.