الان – صفقة مريحة وببلاش.. 5 مهاجمين على رادار الأهلي في الصيف – البوكس نيوز

3 مهاجمين أجانب منهم واحد جاي من الدوري الإنجليزي.. ومهاجم مصري.. والخامس من أبناء الزمالك.. دول اللي شافهم مارسيل كولر المدير الفني للأهلي واقتنع بيهم.. وعايز الخطيب يخلص مع اتنين منهم عشان يعوضوا غياب موديست وكهربا لو راح احترف في السعودية.. مين المهاجمين الخمسة المعروضين على كولر؟.. ومين ابن الزمالك؟.. ده اللي هنعرفه مع بعض في “عرب 22”.

مارسيل كولر خد بطولة دوري أبطال أفريقيا من هنا وطار على سويسرا يقضي يومين مع العيال وأمهم.. ويفك شوية من جو الماتشات والشغل.. لكن قبل ما يمشي لجنة الأسكاوتينج في النادي اللي بيرأسها نجم الأهلي السابق هاني رمزي.. عرضت عليه أسماء 5 لعيبة مهاجمين يعوضوا غياب أنتوني موديست المهاجم الفرنسي اللي هيتمشي آخر السنة بعد ما فشل يقدم أوراق اعتماده في القلعة الحمراء.

وكمان كولر عايز يأمن مركز رأس الحربة وعامل حساب محمود عبدالمنعم كهربا اللي متوقع أنه يمشي آخر السنة ويروح يحترف في السعودية عشان يعوض خسارة الفلوس اللي دفعها غرامة للزمالك.. وكدا مش باقي غير وسام أبو علي لوحده في خط الهجوم.

وقرر المدرب السويسري أنه يجيب مهاجم محلي وواحد أجنبي.. ولجنة الاسكاوتينج عرضت عليه سيفيهات 5 مهاجمين لما شافهم واتفرج عليهم عجبوه.. وهيقعد مع لجنة التخطيط بحضور الكابتن محمود الخطيب ويناقشهم.

ولجنة الكرة عارفة كويس قوي إن الفريق محتاج لصفقات حتى لو هو بطل أفريقيا.. الصفقات دي لازم تدعم الفريق عشان يفضل ديما على القمة ويحقق بطولات تاني ودي ثقافة النادي الاهلي والأندية الكبيره دايما عايز تدعيمات.

أول لاعب عرضته لجنة التخطيط على كولر هو المهاجم الإيفواري محمد كانوتيه، لاعب فريق جروزني الروسي اللي كان رافض ييجي الأهلي، لكن رجعت المفاوضات من تاني خاصة أن اللاعب هيكون حر في نهاية الموسم.

كولر مقتنع بيه وشايفه مهاجم كويس جدا.. ولو جه الأهلي هيكون في صفقة انتقال حر مريحة للنادي الأهلي.. وطلب المسئولين يخلصوه معاه بعد ما أبدي قناعة كبيرة بإمكانياته الفنية والبدنية واعتبره نموذج ملهم للمهاجم اللي نفسه يتعاقد معاه عشان يستفيد من قدراته الفنية والبدنية.

اللاعب التاني اسمه محسن بوريكة وهو مهاجم فريق المغرب الفاسي وبيلعب في الدوري المغربي.. ويعتبر هداف الدوري

المغربي حاليا برصيد 12 هدف ومن مواليد سنة 2000 وعنده 24 سنة.. وده واحد من أهداف الأهلي في فترة الانتقالات الصيفية الجاية.. ويعتبر من أفضل المهاجمين هناك وصغير في السن.

واللاعب المغربي لما اتسأل على رغبة الأهلي في التعاقد معاه قال: “الأهلي فريق كبير والجميع يتمنى اللعب هناك.. لكن أنا ملتزم بعقدي مع فريقي اللي مكمل 2025.. ولو عايزين يتعاقدوا معايا يتفاوضوا مع النادي”.

لكن المهاجمين المصريين اللي عرضتهم لجنة الأسكاوتيج على كولر هما أحمد أمين قفة مهاجم إنبي، وأسامة فيصل نجم البنك الأهلي وابن الزمالك السابق.. لبس الكفة دلوقتي مايلة ناحية “قفة”.. الاتنين موجودين في الصورة بس المرحله دي كولر شايف قفة هو اللي ينفع يكون مهاجم الأهلي مع وسام أبو علي.

أسامة فيصل يعتبر واحد من أفضل المهاجمين في الدوري المصري والمنتخب الأولمبي في الفترة اللي فاتت وعنده إمكانيات كبيرة ومتعود على اللعب تحت ضغط عشان شارك في الزمالك ومش بيخاف من الجماهير.

كولر لحد دلوقتي بيفاضل بينهم.. وعامل أولوية لكل واحد.. والخمسة عجبوه.. وهيبدأ أمير توفيق مدير التعاقدات في المفاوضات حسب الترتيب اللي عمله كولر.. لو فشلت المفاوضات مع لاعب هيروح للي بعده.