الان – تريندات مصر ماذا فعل جمهور الترجي مع مشجع أهلاوي؟.. ملخص مباراة الأهلي والترجي في نهائي دوري أبطال أفريقيا – البوكس نيوز

غنى ليهم أغنية الأولتراس “يا لهوي على اللي حصل فيكم.. تنسوا ازاي؟.. جمهور نساي”.. الهتاف المشهور اللي اتقال في قلب ستاد رادس.. لكن ردهم عليهم كان مفاجأة.. أيه اللي حصل على من جماهير الترجي؟.. وعملوا أيه في الشوارع بعد وصولهم مصر؟.. وإزي ردت الجماهير المصرية؟

جماهير الترجي بدأت أجواء النهائي من مطار قرطاج الدولي قبل وصولهم لاستاد القاهرة الدولي.. في كل مكان يحطوا رجليهم فيه يقعدوا يغنوا ويهتفوا لفريق الترجي عشان يدعموهم ويحمسوهم قبل الماتش الصعب قدام الأهلي في بطولة دوري أبطال أفريقيا.

وفي الطيارة اللي بتنقل جمهور الترجي لاستاد القاهرة الدولي الجماهير قعدت تغني وترخم على مشجع أهلاوي فراح غنى ليهم أغنية الأولتراس الشهيرة “يا لهوي على اللي حصل فيكم.. تنسوا ازاي؟.. جمهور نساي”.. وهم حاولوا ردوا عليه لكن محصلش تطاول منهم.. وكل واحد غتى لفريقه.

وبعد ما وصلوا القاهرة كل مكان يروحوه ييقعدوا يغنوا كأنهم في الاستاد.. في منطقة الحسين وهم قاعدين على القهاوي غنوا للترجي وتفاعل معاهم المصريين ورحبوا بيهم.. ونفس اللي حصل عند منطقة الأهرامات وفي الشوارع اللي جنبها.

مشجعين الترجي ركبوا الجمال والأحصنة ومشيوا يغنوا في الشارع.. وقالوا إن فريقهم هو اللي هيكسب بطولة دوري أبطال أفريقيا للمرة الخامسة في تاريخه.. والماتش هيخلص بالتعادل 1-1 عشان يبقي الترجي فايز بهدف اعتباري وياخد البطولة.

الجماهير في مصر رحبت بالأخوة التوانسة وقالوهم أنتوا في بلدكم التاني لكن الأهلي هو اللي هيكسب.. واحد من مشجعين الأهلي في مصر قال: “الترجي والأهلي توأمه أبدية وجماهيرهم أخوات وتنافس الملعب.. تنافس رياضي بس”.

جماهير الترجي اللي وصلت للقاهرة أكتر من 8 آلاف مشجع وده عدد أكبر من المتفق عليه في الاجتماع الفني للمباراة واللي بتوصل لـ2500 مشجع.

موقع “موزاييك FM” قال إن السفير التونسي في مصر والسلطات بلغوا المسئولين المصريين أن 2500 تذكرة ميكفوش الجماهير اللي وصلت مصر.. وبيعملوا دلوقتي على أنهم يزودوا عدد التذاكر عشان تكفي كل المشجعين التوانسة الموجودين في القاهرة.

جمهور الترجي عمل تيفو قبل ماتش الذهاب قدام الأهلي في ستاد رادس قلب الدنيا والناس كلها احتفلت بيه في مصر وتونس وباقي دول العالم الحر اللي أشادوا بالدخلة وقالوا أنها بتوضح المعاناة اللي بيعيشها أخواتنا على الحدود أصحاب الأرض.

لكن السفير التونسي في مصر حذر جماهير الترجي من استخدام أي شعارات سياسية في الماتش.. وقالهم: “طرق التشجيع وطبيعة الشعارات المرفوعة في الملاعب تختلف بين تونس ومصر.. واللي مسموح بيه في تونس مش مسموح بيه في مصر.. وكل بلد ليه عاداته وتقاليد وإحنا لازم نحترم المصريين”.

الأهلي هيقابل الترجي يوم السبت 25 مايو في ماتش العودة على ستاد القاهرة الدولي.. والجماهير العربية والإفريقية عايشة حالة من الترقب والحماس منتظرين يشوفوا مين هيقدر يحسم الصراع الكروى الكبير بين الناديين الأهلي ولا الترجي.

الأهلى بقيادة مدربه السويسرى مارسيل كولر عشمان يحقق لقبه الـ12 في دورى أبطال إفريقيا.. وده بعد فوزه في النسخة اللي فاتت على حساب فريق الوداد المغربى.. لكن الترجي عشمان يحقق اللقب الخامس في تاريخه عشان يتساوي بالزمالك ومازيمبي الكونغولي.

الأهلى هو أكتر فريق تتويج ببطولة دورى أبطال إفريقيا وعنده 11 لقب وبعده الزمالك ومازيمبى اللي كل واحد عنده 5 وبعدهم الترجي اللي عنده 4 ألقاب.