الان – تريندات مصر تفاصيل لقاء إمام عاشور وشيكابالا في كأس مصر بالسعودية فيديو – البوكس نيوز

الكلام كتير على انتقال إمام عاشور للأهلي واعتذاره لكابتن الزمالك شيكابالا ومحدش مصدق اللي بيتقال.. لكن ظهرت 3 أدلة جديدة بتأكد اعتذار لاعب الأهلي عن خطوته الأخيرة بالرحيل عن القلعة البيضاء والانتقال للغريم التقليدي.. مش بس اللي حصل في ماتش القمة بين الأهلي والزمالك؟.. لأ.. ده فيه شهود على واقعة اعتذار إمام حضروا اللي حصل وحكوه اللي شافوه.. تعالوا نقولكم أيه كواليس الاعتذار.. وإزي رد شيكابالا على اللي الموقف اللي حصل؟.

طارق السيد لاعب الزمالك السابق قال إن إمام عاشور طلب قبل كده من كذا زملكاوي.. وعلى إيدي عايز يرجع الزمالك وعودته مش مرغوب فيها ولا بنتمناها وعقده مكمل مع الأهلي.. وهو بيحاول يحسن العلاقة مع لعيبة الزمالك ويلمهم تاني وخاصة شيكابالا.. إمام زعلان إنه مرجعش على الزمالك وقت احترافه في الدنمارك.. وده مش هيفيد بحاجة ولا مبرر إننا ندعمه وهو في الأهلي.. وهو كمان ماشي بدماغ كهربا.. إمام موضوعه ميت بالنسبة لجماهير الزمالك.

في ماتش نهائي كاس مصر اللي اتلعب في السعودية يوم 8 مارس 2024 وفاز بيه الأهلي.. إمام عاشور ظهر في لقطة من الشوط التاني وهو بيقرب لشيكابالا وغطى بؤقه بالتيشيرت واتكلم معاه.. وإحنا معرفناش بيقول أيه.. أو أيه اللي حصل بينهم.. لحد ما جه الصحفي حامد وجدي وكشف اللي دار بينهم.

حامد وجدي ظهر مع الإعلامي سيف زاهر وقال: “شيكابالا وإمام عاشور أول مرة يتقابلوا من وقت انتقال إمام عاشور للنادي الاهلي.. كان في مباراة نهائي الكاس ما بين الزمالك والاهلي.. ولعيبة الزمالك والمقربين من إمام عاشور عارفين ومتأكدين إن السبب الرئيسي في انتقال إمام عاشور للأهلي.. هو كهربا.. وعارفين ان المتحكم في إمام عاشور وتصرفاته برضو كهربا.. والدليل إن إمام عاشور بعد انتهاء المباراة كان في لقاء مع أحد الإعلاميين وبعد كده كهربا راح وسحبوا ومرضيش يخليه يسجل”.

“كهربا عمل مع إمام زي الأب ما بيسحب ابنه الصغير ومعملش الحوار وبعد كده الكابتن محمد الشناوي تدخل وحل الأزمة ورجع عمل حوار.. في الدقيقة 81 إمام عاشور شد التيشيرت على بؤقه واتكلم مع شيكابالا وقاله: ”معلش يا كابتن متزعلش مني أنت عارف ان الظروف هي السبب.. وده اللي قاله مصادر قريبة من شيكا وإمام”.

الإعلامي هاني حتحوت كان حاضر ماتش نهائي كاس مصر في السعودية.. وكان قريب من أماكن جماهير الزمالك وقال إنه إمام عاشور وقع على أرضية الملعب قدام جمهور الزمالك اللي كان بيزوم عليه.. فقام إمام وشاور للجماهير البيضاء وقالهم حقكم على رأسي متزعلوش مني.. لكن الجماهير مقبلتش اعتذار عاشور اللي مشي بعدها.

حتحوت قال أنا شوفت الموقف ده وشاهد عليه.. وشايف أنه مفهوش حاجة.. لكن لما برضو موقف إمام عاشور والاحتفال قدام فريقه السابق ناس شيفاه إن مينفعش برتوكوليا.. إن اللعيب يحتفل قدام فريقه السابق.. لكن هو يحتفل عادي.

صفقة انتقال إمام عاشور من الزمالك للأهلي كانت مدوية وصدمة كبيرة للجماهير في مصر خاصة بعد اللي عمله إمام واللي كان معروف عنه تشجيعه وتعصبه لنادي الزمالك لدرجة أنه شتم وسب أهم رموز في النادي الأهلي وهو صالح سليم .. ده غير هتافاته المعادية لجماهير الأهلي وقت ما كان في الزمالك.

عشان كدا الجماهير والنقاد الرياضيين مش مصدقين اللي حصل من إمام عاشور وأنه يروح الأهلي خاصة بعد هتافات جماهير المارد الأحمر ضد إمام وأنهم مش عايزين الصفقة،.. لكن إمام في النهاية راح القلعة الحمراء ومقدم أداء عالي أوي مع النادي الأهلي من وقت انتقاله وقدر يكسب معاهم كام بطولة آخرهم بطولة كاس مصر اللي اتلعب في السعودية قدام الزمالك في أجواء تاريخية.