الان – تركت الطب ووقفت ضد مرتضى.. من هي زوجة الخطيب نيرفين فريد.. ولماذا بكت في إعلان مشروع القرن – البوكس نيوز

عيطت في ليلة إعلان مشروع القرن.. ووقفت ضد مرتضى منصور .. واعتذر ليها تركي آل الشيخ.. ومحمود الخطيب قال عنها: “دي نعمة ربنا عليا”.. وأبوها من أبطال حرب أكتوبر.. وسابت الطب من أجل الخطيب وأولاده.. مين هي نيرفين فريد زوجة الكابتن محمود الخطيب؟.. وإزي دعمت الخطيب وتحدت العالم كله عشان خاطره؟.. وليه بكت في ليلة تدشين مشروع القرن؟.. وأيه حكاية زواجها من بيبو؟.. ده اللي هنعرفه مع بعض في “عرب 22″.

في ليلة 4 يونيو 2024 وقف محمود الخطيب رئيس النادي الأهلي على المنصة عشان يقول كلمته في حفل مشروع القرن وأول ما الخطيب قال: أنا على فكرة طالع تاني عشان اتعالج اليومين اللي جايين دول.. ونفسي أشوف الأهلي بيلعب في استاده حتى لو كنت قعيد.. علشان أكون رديت جميل للنادي وللجماهير.

وبشكر ربنا على كل أمر فيه توفيق.. ربنا أكرمنا بيه.. احنا عمرنا ما كنا قريبين من حلمنا زي النهارده عشان كده أنا عايز اقول استنينا سوا وهنبنيه سوا باذن الله”

والكاميرات جت على وشه مراته السيدة نيرفين فريد وهي متأثرة بالكلام ومتفاعلة معاه والدموع هتسقط من عنيها عشان كلام زوجها.

الست دي زي أي زوجة مصرية أصيلة وقفت مع زوجها في مشاكل كتير وأزمات في وقت ناس كتير اتخلت عنه.. ومنها مثلا مشاكله مع المستشار مرتضى منصور رئيس نادي الزمالك السابق اللي كان دايم الهجوم زوجها وأهل بيتها.

فيه مقطع فيديو انتشر على السوشيال ميديا فيه كلام وحش عن زوجها وأسرتها هي طلعت على فيسبوك وقالت: “أنا بنت رجل مقاتل من خير أجناد الأرض أعطى عمره وصحته للبلد.. وزوجة رجل أدى كل ما يستطيع من جهد وعرق وصحة للبلد وما زا.. ومش طالبين المقابل لأن خدمة البلد فخر وعزة وواجب.

أنا بطالب بحقي في الحياة بكرامة مرفوعة الرأس لأني كبنت مقاتل اتربيت على الكرامة وعزة النفس.. كزوجة رجل شايفاه أشرف الرجال وأنقاهم وأصدقهم حباً لوطنه وبلده وأهل بلده.

من حقنا نعيش في بلدنا آمنين مطمئنين.. ليه ندفع التمن من سمعتنا وعرضنا وكرامتنا.. فاض الكيل.. وعايزة حقي يا بلد.

وفي 2019 اعتذر ليها المستشار تركي آل الشيخ وكتب على “فيسبوك”: “وصلني عتاب المحب من حرم الكابتن محمود وبناته أن فيه أشخاص أساؤوا ليهم واستخدموا اسمي.. أنا وبيبو رجالة ونستحمل.. الأخت الكريمة وبناتها خط أحمر لا أسمح بالإساءة ليهم.. ومشوفتش منها ومن بناتها غير كل رقي واحترام.. عيب تدخلوا المحارم في حواديت الكورة.. اختشوا.. وحقها وبناتها على رأسي من فوق”

زوجة الخطيب بنت اللواء فريد متولي من أبطال حرب أكتوبر.. وبيبو اتكلم عليها وقال هي من نعم ربنا عليا.. وفي المشاكل اللي بتقابل كل أسرة أنا كنت بسكت وقت ما يحصل خلاف بيننا.. ومع مرور الوقت بدأت تعرف طباعي وبقيت هي اللي تعتذر حتى لو كنت غلطان.

وطول فترة زواجنا اللي بدأت سنة 1982.. كانت بتتعامل بتضحية وده ظهر في بعد ما اتخرجت من كلية طب الأسنان وأول ما خلفنا طلبت منها تسيب الشغل عشان تربي بناتنا وهي وافقت وخد القرار ولقيتها تاني يوم بتقولي أنا سبت الشغل.

الخطيب ونيرفين ربنا رزقهم بـ3 بنات رنا وندا ونور.. واختار ليهم أزواج صالحين وهما محمد ياسر زوج رنا، وزوج ندا هو حكم عبد الخالق نجل المطرب علاء عبد الخالق، وأسامة حسني نجم الأهلى السابق فهو زوج بنته نور آخر العنقود