الان – بالأسماء.. الراحلين عن الأهلي في الموسم الجديد.. ومفاجأة نجم أهلاوي خطط ليكون كوبري في الزمالك – البوكس نيوز

كولر حسم الأمر خلاص.. وحدد اللعيبة اللي هتمشي من الأهلي في الصيف الجاي سواء خلص الدوري في ميعاده أو اتاخر لحد شهر 8.. قبل ما يقعد مع لجنة التخطيط قال هو عايز أيه بالضبط عشان يبني فريق قوي ياكل الأخضر واليابس.. بيدعم في كل الخطوط.. وهيتخلص من اللعيبة اللي مش عايزها وشايفاها عالة على الفريق ومش بتخدم الخطط بتاعته.. مين هم اللعيبة اللي هيمشوا؟.. وأيه موقف الكابتن محمود الخطيب؟.. ومين اللعيب اللي كان عايز يبقي كوبري للزمالك؟.. ده اللي هنعرفه مع بعض في “قشة لفة بلس”.

أول لعيب هيمشي من الأهلي في الصيف هو محمود متولي اللي ديما مصاب والفريق مش عارف يستفيد منه عشان الإصابات الكتيرة اللي بتيجي ليه كل شوية.. ورغم أن المدير الفني للفريق مارسيل كولر لعبه في ماتش الذهاب قدام مازيمبي في الكونغو لكن رجع استبعده تاني من ماتش العودة اللي اتلعب في القاهرة.

كولر بلغ المسئولين في القلعة الحمراء أنه مش عايز متولي معاه في الفريق.. في موسم الانتقالات اللي فاتت.. وعشان كدا سمحوا ليه بالتفاوض مع الأندية عشان يمشي لكن موصلش ليه أي عروض سواء من برة مصر أو من فرق الدوري المحلي.

العلاقة بين كولر ومتولي مش في أحسن حال وكان وقع عليه عقوبات قبل كدا بسبب اعتراضه على اللعب.. لكن المدير الفني بلغ إدارة الكرة إنه عايز 3 مدافعين عشان يعوض رحيل محمود متولي.. ومعاه محمد عبدالمنعم اللي مصمم على الاحتراف وعايز يمشي من الأهلي في الصيف بأي طريقة.

واللي يعتبر هو تاني لعيب لحد دلوقتي.. رغم إن الإدارة بتحاول تقنعه أنه يكمل مع الفريق ويظبطوا ليه العقد الجديد ويوفروا ليه إعلانات عشان يعوض فرق الفلوس المعروضة عليه لكنه مصصم على الرحيل.. وإدارة الأهلي وافقت ليه لكن اشترطت عليه يجيب عقد احترافي في أوروبا أو يكون مبلغ مغري لو عايز يروح أندية الخليج سواء السعودية أو الإمارات أو قطر زي ما حصل مع حمدي فتحي.

تالت لاعب المفروض إنه هيمشي من الأهلي رغم الأداء المميز اللي قدمه مع الفريق في الماتشات الأخيرة سواء قدام الزمالك في الدوري في الماتش اللي فاز فيه الزمالك أو في نص نهائي دوري أبطال أفريقيا قدام مازيمبي هو أحمد عبدالقادر جناح الفريق.

كولر بلغ إدارة الأهلي إنه مش اللاعب مش هيكون موجود في الموسم الجاي لأنه المفروض كان هيمشي في فترة الانتقالات الشتوية لكن العرض إللي جاله من النادي التركي مكنش قوي.. والاهلي خاف أنه يكون كوبري للزمالك.. وحصل اتفاق بين اللاعب وإدارة النادي إنه ينتظر لبداية الموسم اللي جاي.. لكن في يناير الاهلي ماارتحش للموضوع.. رغم إنه جاله عروض تانية إعارة في قطر وسموحة في الدوري المصري لكن الاهلي أجل كل العروض لآخر الموسم.

واحد من اللعيبة اللي قرر كولر إنها هتمشي هو خالد عبدالفتاح الباك اليمين اللي جه الاهلي على سبيل الإعارة من سموحة وبعد كده النادي فعل بند الشراء بـ10 مليون جنيه… وبدأ بشكل كويس مع الفريق لكن قعد دكة لمحمد هاني وبقي ترتيبه في مركزه رقم 3 بعد عمر كمال عبدالواحد.

خالد عبدالفتاح تصريحاته قلبت الدنيا لما طلع وقال إنه معندوش مشكلة يلعب في الزمالك لو مشي من الأهلي.. والكلام ده ضايق الجماهير والمسئولين في الأهلي اللي قرروا أنهم هيمشوه في آخر الموسم.

طبعا فيه لعيب كلنا عارفيه إن هيمشي واتبلغ وكيله بشكل رسمي أنه مش هيكون موجود في الأهلي الموسم الجاي.. خاصة أن النادي الأهلي جابه عشان مرحلة معينة وهي كاس العالم للأندية اللي اتلعب في السعودية ودوري أبطال أفريقيا.. لكن للاسف الشديد خيب كل التوقعات.

اللي بنتكلم عنه هو أنتوني موديست المهاجم الفرنسي اللي عنده 36 سنة ومش منسجم مع لعيبة الاهلي وبقي يلعب عليه وسام أبو علي اللي متألق مع الفريق وقدر يسجل أول أهداف في الدوري المصري وفي بطولة أفريقيا قدام مازيمبي في ماتش العودة اللي فاز فيه الأهلي 3 صفر.

الأهلي عايز يكون فريق قوي عشان داخل على كأس العالم للأندية بشكله الجديد واللي هيتلعب في أمريكا ومحتاج سكوات قوي جدا.. بحيث يكون عنده 11 لاعب قوي جدا يلعبوا أساسي وعلى الدكة يكون صف تاني قوي يقدر يعوض الغيابات اللي هتحصل.