الان – أجور ضيوف إبراهيم فايق في برنامجه الجديد.. وسر خناقة مع مهيب عبدالهادي – البوكس نيوز

إبراهيم فايق مشي من أون تايم سبورتس وراجع ببرنامج جديد على شبكة قنوات MBC .. وناوي يكسر الدنيا كعادته.. نجح في برنامج جمهور التالتة وعايز ياخد المشاهدين في برنامجه الجديد اللي سماه “الكورة مع فايق”.. لكن المفاجأة في أجور الضيوف اللي هيطلعوا معاه في الحلقات.. هياخدوا كام؟.. ومين أغلى أجر؟.. وكولر طلب كام عشان يطلع معاه؟.. وأيه حكاية خناقته مع مهيب عبدالهادي؟.. ده اللي هنعرفه مع بعض في “عرب 22”.

إبراهيم فايق راجع بتقله بعد ما اتعاون مع المستشار تركي آل الشيخ رئيس هيئة الترفيه السعودي.. وناوي يجيب ضيوف فرز أول مش أي حد.. يعني كدا هتلاقي معاه أساطير من الدوري السعودي زي كريستيانو رونالدو وساديو ماني.. ومدرب الأهلي السويسري مارسيل كولر.. وكمان نجوم الدوري المصري زي أحمد سيد زيزو وإمام عاشور وغيرهم من السوبر ستار في الكورة.

برنامج إبراهيم فايق هيبقي على “MBC مصر2” والقناة أعلنت عنه في بيان وقالت: “لتحقيق متابعة مميزة لكل عشاق الرياضة في مصر والعالم العربي.. تطلق القناة البرنامج الرياضي اليومي الجديد “الكورة مع فايق” اللي هيقدمه الإعلامي الرياضي إبراهيم فايق من يوم الجمعة لحد يوم الثلاثاء الساعة 11 مساء.. وأول حلقة ليه بدأت في يوم 26 مايو”.

البرنامج هيكون برعاية موسم الرياض يعني هنشوف حاجة على أعلى مستوى.. وعشان إبراهيم فايق إعلامي شاطر عرف يستغل حدث قوي زي ماتش العودة في نهائي كأس إفريقيا بين الأهلي والترجي عشان يبدأ بيه برنامجه اللي قدم فيه تحليل فني كامل للمباراة المهمة وقدم انفرادات وموضوعات حصرية.

مصادر قالت إن القناة عاملة ميزانية مفتوحة عشان يجيب أهم وأبرز الضيوف في الكورة سواء مدربين أو لاعبين حاليين أو سابقين.. والأجور في الحلقة الواحدة هتبدأ من 20 ألف دولار للعبية المصريين وهتزيد حسب قوة اللاعب ونجوميته.. لكن المفاجأة أن القناة بعت إيميل رسمي للنادي الأهلي عشان يستضيفوا مارسيل كولر المدير الفني للفريق.. وعرضوا عليه 25 ألف دولار.

إبراهيم فايق استضاف وسجل فعلا مع نجوم الدوري السعودي زي الأسطورة كريستيانو رونالد نجم نادي النصر واللي محطم الأرقام القياسية في دوري روشن.. ومعاه ساديو ماني لاعب النصر وهيتكلم معاه عن مشواره في الدوري الإنجليزي وعلاقته بكابتن منتخب مصر محمد صلاح.. ومشوار منتخب السنغال في تصفيات كاس العالم ومستقبله هيكمل في النصر ولا لأ.

ومن الدوري المصري إبراهيم فايق هيستضيف نجوم زي أحمد سيد زيزو لاعب اللي عرضوا عليه مبلغ 10 آلاف دولار لكن والده رفض المبلغ ده وطلب فلوس تاني.. ونفس الموقف بالنسبة لإمام عاشور اللي هيظهر مع إبراهيم فايق في حلقة من البرنامج.

مصادر قالت إن إبراهيم فايق حصلت خناقة بينه وبين مهيب عبدالهادي على جوزيه جوميز مدرب الزمالك اللي طلع مع مهيب بعد فوز الفارس الأبيض ببطولة الكونفدرالية اللي توج بيها الزمالك قدام فريق نهضة بركان المغربي.. وكان عايزه ميطلعش وينتظر يطلع معاه في برنامجه الجديد… وحاول يمنعه من الظهور لحد الدقائق الأخيرة من دخوله على الهواء.

إبراهيم فايق من مواليد سنة 1984 في الجيزة، وحاصل على بكالوريوس الصحافة والإعلام من جامعة القاهرة.. ودخل مجال الإعلام وبدأ حياته المهنية مراسل تلفزيوني.

اشتغل في قناة الحياة وقدم مجموعة من البرامج زي “كورة النهار” و“كورة العربية” و“كورة نيوز”، وأشهر برنامج جمهور التالتة على قناة أون تايم سبورت.